由韓國Mnet官方唯一授權嘅中國版「Produce 101」《創造101》,上週六進行第三輪專業考核公演。歌手許靖韻(Angela)繼上次第二輪公演成為「點讚王」後,今次Angela再下一城,冧庄「點讚王」! 不嬲賣開唱功嘅Angela相對其他對手喺跳舞方面一直處於弱勢,上一次跳舞對決,Angela嘅排名更因為咁而跌至尾二。今次第三輪考核係邊跳邊唱,Angela一組就揀咗原創歌曲《別人家的小孩》,賽前訓練時,導師羅志祥亦都表示呢個舞蹈完全唔係佢哋組嘅style ,因為反差太大。不過正式公演時,Angela出乎意料嘅表現令全場觀眾驚喜,一身紅色波點西裝造型,加埋強勁嘅舞步,令人眼前一亮!最後以組內最高點讚票數冧庄成為「點讚王」! 就連韓國男團EXO前成員兼節目製作人黃子韜宣佈「誰是點讚王」時,都忍唔住大讚Angela跳得好,「作為vocal擔當的許靖韻第一次跳舞!許靖韻這次是唱跳歌手了!」完全冇諗過成為「點讚王」嘅Angela即刻O晒嘴,旁邊組員同佢講咗兩次「it's real! it's real!」佢先至「回魂」,Angela喺台上話:「謝謝大家!上一次晉級的時候,我就跟自己說,如果我可以再站在《101》的舞台上這次一我一定要跳舞!」節目完結後,Angela表示:「所有人都知道我在舞蹈裡面是完全不行的,我就想在節目裡做一個突破把每一個舞蹈都跳到最好,其實我現在也愛上跳舞。」 另外,節目官方微博就啱啱公佈咗最後22強嘅名單,喺比賽過程中好似坐過山車嘅Angela亦都殺入總決賽,嚟緊呢兩個禮拜就會進行地獄式訓練,23號騰訊直播時會再淘汰11人,剩低嘅11個女仔就會組成女團出道。由101人廝殺到最後22人,許靖韻係香港唯一嘅女歌手代表,認真威水