下星期四(14日)就喺紅館開show嘅張敬軒,呢排雖然忙住練歌練舞,不過向來玩社交平台玩到出神入化嘅佢依然有keep住update。今次佢就同一個網上媒體合作惡搞自己,日前佢喺facebook post咗自己一首好有代表性嘅歌《酷愛》,不過就係越南搞笑版。 唔講唔知,原來《酷愛》真係有個越南版,不過係男女合唱。今次原唱嘅軒仔就自己親身上陣用越南話唱。睇番成個MV嘅拍攝手法,好似好簡單,軒仔只要楝喺度郁吓啲手手腳腳咪咀唱就搞掂,其實製作好一絲不苟,MV特登搵越南西貢市中心環境、越南女生着住傳統服裝「奧黛」及頭戴「斗笠」、越南特色美食等片段墊底,嗰朕越南味出晒嚟;另外,軒仔嘅造手同表情完全配合晒個MV,鄉土風情勁濃沃。 至於歌詞方面,為咗容易啲唱,於是用中文寫個越南讀音,好似副歌其中一句「難道愛愛愛愛愛對愛情已死心」就變成「人哋掃跌美碟扶潔珍寶種b man」。軒仔話成個MV拍攝,最難搞就係歌詞,「唔好話唱,就咁睇住讀都好翹口,真係唱咗N咁多次。有一句原本歌詞係『你怎安心可不改漂毫』變咗『弄奀痴檬梯m蘇懵能』發音好似粗口,呢句就唱得好順口啦,哈哈。」 facebook link: https://www.facebook.com/hinscheungofficial/posts/1850159531711611