已經落實為內地爆紅歌唱節目、浙江衛視《中國新歌聲(前名:中國好聲音)》第三季擔任導師嘅謝霆鋒,噚日(5日)現身北京鳥巢為節目拍攝導師宣傳短片。 宣傳片講述霆鋒揸住節目組嘅「試音大貨車」喺北京地標鳥巢兜圈,素人選手可以自由上車唱歌俾霆鋒聽,如果霆鋒覺得唱得好,就可以發直通卡,邀請對方參加現場錄影。話就話拍宣傳片,不過其實現場真係有素人走上貨車唱歌俾霆鋒聽,噚日香港一號風球又落雨,北京就啱啱相反,曬到爆炸之餘,氣溫仲高達41度,不過霆鋒都好有耐性好認真咁聽晒所有素人選手唱,唔係因為拍宣傳片,拍完幾個鏡就算。 呢頭認真聽,轉個頭霆鋒突然「Chef LeMon」上身。高溫之下,本來着住紅色格仔衫嘅霆鋒都忍唔住要脫,太陽曬到地面同車都勁辣手,呢個時候,霆鋒行到車頭用手摸吓車頭冚個熱度,然後就露出一副好滿意嘅表情同工作人員講:「想要個雞蛋!」之後仲做咗個煎蛋嘅動作,即席喺引擎蓋上表演「鋒味煎蛋」,睇到現場嘅人拍手大笑。