選秀騷跳舞包尾 許靖韻晒唱功翻身做點讚王 上週六,國內首個女子團體選秀節目《創造101》進入第二輪公演,香港唯一女歌手代表許靖韻(Angela)再次登場。經過之前分班、分組對決後,今次練習生們要從唱作、舞蹈或聲樂中,三選一作為專業考核主題。今次Angela喺台上自彈自唱嘅表現令一眾導師及觀眾眼前一亮,為佢之前喺跳舞方面的失分挽回唔少分數,最後佢仲拎埋組內「點讚王」稱號𠻹。 其實喺訓練期間,Angela同同組練習生喺聲樂堂中明顯見到有好大距差,無論喺鋼琴彈奏、歌曲旋律、又或者音準,Angela都拿挰得恰到好處,就連擔任聲樂老師嘅Ella都對佢讚口不絕,「她前幾集的表現,一直在做她不擅長的事情,所以排名較尾。其實許靖韻讓我覺得在唱歌上面很穩!」 公演當晚,甫出場時,後台一眾練習生已經不停大嗌Angela為佢加油。Angela一組選擇演唱Justin Bieber嘅《Let Me Love You》。節目開場,Angela坐喺琴前先為組員們伴奏,輪到自己唱時,導師同練習生都露出讚嘆神色,現場歡呼聲不絕。 每組演唱後,現場觀眾都會投票選出組入面嘅「點讚王」,當導師宣佈Angela成為組中「點讚王」時,佢即刻爆喊,因為經過上一次佢最唔擅長嘅跳舞對決後,Angela嘅排名跌到五十四(尾二),所以今次一宣佈佢係「點讚王」時,難怪咁激動,「謝謝大家的點讚,因為我是墊底晉級的……我來之前我不會舞蹈,話也說的特別差。」然後其中一位導師胡彥斌就問Angela,「你自彈自唱鋼琴,你為甚麼沒有選我們唱作組啊?」Angela邊抹眼淚邊話:「因為我知道,這一次可能是我最後次站在101的舞台上,然後我想選我最擅長的東西,就是聲樂,讓我可以再一次站在101的舞台上。」最後,導師Ella亦都喺台上恭喜Angela成功翻身,「恭喜你靖韻,你做到了!而且你成為「點讚王」,我真的很為你開心。」