EEG 英皇娛樂
2 個月前
112
2 個月前
112
臭蟹軒 VS 臭魷魚細So の 誰是歌手
臭蟹軒 VS 臭魷魚細So の 誰是歌手 早前,張敬軒同商台DJ細So去日本做直播節目之餘,仲去咗「女僕cafe」同「人妻廚房」潮聖一番。今次佢哋就搞吓啲新意,玩街頭實測比賽,佢哋要完成兩個任務,第一:喺表參道搵途人合照;第二:叫途人估佢哋「誰是歌手」。邊個搵得最多途人合照、同埋估中佢哋邊個係歌手就勝出。 為咗增加遊戲難度及騎呢度,軒仔同細So二人分別要戴住蟹型頭套同魷魚頭套搵途人合照。出發前佢哋都做足準備,學定「可以影張相嗎?」嘅日文點講。一開始,細So就好積極咁搵途人影相,見到兩位女士就即刻衝過去問,不過佢就將「影相」嘅日文講錯咗「拖羅」嘅日文,變咗「可以影張『拖羅』嗎?」兩位女仕當然耍手擰頭咁拒絕啦。 而軒仔都問咗好幾個途人之後,先至成功搵到個少女合照。影完後,軒仔就叫少女估吓佢哋兩個「誰是歌手」,細so話:「one is superstar,another one is『奀』star。」少女好醒目,一估就估到軒仔係歌手,細so問係咪因為軒仔靚仔啲,少女笑住點頭,仲話軒仔:「kawaii(好可愛)!」之後軒仔同細so繼續進行任務,佢哋搵咗三個等緊過馬路嘅女仔,三個都估中軒仔係歌手,而且仲成功合照,之後佢哋問軒仔喺香港係咪真係好出名、又問軒仔叫乜名,軒仔就即刻拎個電話出嚟show吓quali啦,㗎妹們睇到即刻大叫:「不得了!唔係呀嘛!」然後就繼續上網喪睇軒仔啲資料。 經過一輪苦戰,最後軒仔以五比零完勝細So。對於今次嘅街頭實測,軒仔都有啲「感受」:「我真係覺得喺香港好幸福,行出街耐唔耐都有啲人搵我哋影相。嚟到日本,求人都冇人肯同我哋影。」細So就話:「原來歌手有樣睇㗎喎!」軒仔就唔執輪咁話:「我不嬲都係偶像歌手嚟㗎啦!」
#張敬軒
留言0 則留言