FOX首度官方發函祝賀奪冠 謝霆鋒登美國國家地理頻道 早前,謝霆鋒於覆蓋全球嘅美食競技節目「FOX Life《名廚爭鋒》」中,同嚟自加拿大嘅名廚David Rocco 以東西方美食進行廚藝對決,最終霆鋒奪得冠軍。日前,美國國家地理頻道發佈一條官方訊息,就係FOX傳媒集團亞洲製片總監Sam Gollestani發函祝賀霆鋒奪冠,Sam Gollestani喺信入面稱讚霆鋒嘅努力同專業:「作為呢個咁成功嘅節目入面嘅第一位優勝者,無疑係一個偉大嘅成就。呢個唔單止反映出您嘅努力,同時亦係您專業廚藝嘅佐證。我哋感謝您嘅參與,並祝您今後嘅烹飪事業中再鑄輝煌!」 據知,呢次係FOX首次對一個節目發出官方信函,而今次更加係繼米芝蓮向霆鋒頒佈首位「米芝蓮之友」嘅榮譽後,第二個國際權威媒體對霆鋒廚藝作出官方認證。對於再次得到國際認可,霆鋒話:「好開心,亦都好榮幸。嚟緊當然會繼續努力,希望做到俾世界各地唔同嘅人知道,中菜都可以係時尚同健康,如果大家想圍護中菜,真係要慢慢一步一步走向世界。」 另外,日前霆鋒去到上海出席「老恒和」代言活動,佢仲即場同大家分享用料酒及調味料心得,「自己對調味料嘅使用係非常嚴格同講究,因為要保證係安全同健康,所以每隻調味料我都會親自試過,然後先至會用喺『鋒味』嘅產品入面。之前拍攝FOX嘅節目,都有用到呢個品牌嘅料酒。」最後,霆鋒喺現場為該品牌成為浙江非物質文化遺產揭幕,同時為多謝大家嘅喜愛和支持,佢仲喺用電話同現場近千名觀眾、嘉賓玩自拍大合照。