廣州《音樂先鋒榜頒獎禮》 李克勤容祖兒狂擸十獎 2018年《音樂先鋒榜頒獎禮》噚晚(19日)於廣州天河體育館舉行,李克勤、容祖兒分別掃走五個獎項,成為歌手入面嘅大贏家;而泳兒、洪卓立、吳浩康及鍾舒漫亦各得兩獎。 李克勤喺噚晚嘅頒獎禮中,先後奪得全國最受歡迎先鋒男歌手、最具影響力演唱會《容祖兒李克勤演唱會》、最佳專輯(30克)、23家電台傳媒聯頒靚聲歌王大獎及憑歌曲《失魂記》奪得先鋒金曲獎項,連掃五獎嘅克勤話:「首先要多謝《先鋒榜》,仲有每一位支持我、愛鍚我嘅歌迷,我會繼續努力。另外而家籌備緊全新嘅國語專輯,今次會同國內好多知名嘅音樂人展開深度合作,希望嚟緊更多機會到內地同歌迷見面。」 同樣掃走五個獎項嘅容祖兒,分別奪得全國最受歡迎先鋒女歌手、亞洲最具影響力歌手、最具影響力演唱會《容祖兒李克勤演唱會》、先鋒金曲 《重生》及最佳原創歌曲《重生》獎項,祖兒表示好開心《重生》呢首歌得到大家嘅肯定,「雖然舊年嘅作品比較少,但嚟緊無論國語或者廣東歌都好快會同大家見面,希望能夠繼續得到大家嘅支持。」 另外,英皇其他歌手亦獲得不錯嘅成績,泳兒奪得最受歡迎先鋒女歌手五強、最佳專輯《Fever》;洪卓立奪得最受歡迎先鋒男歌手五強、先鋒演繹歌手銀獎;吳浩康奪得先鋒演繹歌手銀獎、樂壇飛躍藝人;鐘舒漫奪得先鋒演繹歌手銀獎、樂壇進步獎,共捧走十八個獎項,可謂今次頒獎禮嘅大贏家。