Evelynchoi蔡穎恩 同攝影師 #譚運佳 結束8年愛情長跑,28號喺雙方父母同親友見證下註冊成為夫婦,攜手步入幸福新生活。好友 陳嘉寳 Anjaylia Chan 見証好友大婚,仲對Evelyn笑言:「歡迎加入人妻俱樂部!」腹大便便嘅佢仲捉住Evelyn嘅手狂摸自己肚皮,祝福好友要不停生B呀。 婚禮喺一個戶外花園舉行,雙方家長同親友共約50人出席,Evelyn由爸爸陪同進場,一對新人互相宣讀誓詞同交換結婚戒指,Evelyn全程幸福甜笑,反而老公就一度哽咽,非常感性。喺親友熱情掌聲同歡呼聲下,呢對新婚夫妻三度深情親吻,Evelyn又大讚老公靚仔:「我好驚喜佢今日呢個Look,平時好少Gel起晒啲頭髮,今日真係好有型,我唔會再畀佢Gel起啲頭髮,咁靚仔,畀其他女仔見到點算呀?!」。 至於問到佢哋嘅生B計劃時,新朗哥就話:「都係追求自然,我哋都好鍾意小朋友,一切順其自然。」對於婚禮上哽咽,佢就話喇:「平時好少對住屋企講深情說話,感覺特別大。」Evelyn就笑老話:「反差有啲大,平時都係新娘喊,估唔到今日調返轉。今日個個都嚟問我『緊唔緊張?』我完全冇緊張嘅感覺,因為太多嘢要處理,無時間緊張。」 Evelyn透露婚後只會休息一日,之後隨時復工:「大家都好錫我,希望我放一日假先開工,工作一直排到明年。今日個個都叫我年生貴子,唔知有無時間生BB。」Anjaylia立即捉住她的手摸自己肚皮,笑說:「即刻過啲畀你!我識佢嗰陣已經好賢淑,會煮好多嘢食又持家有道。」