早前到英國留學嘅 Feanna黃淑蔓 ,因為疫情關係,暑假返港後暫時留港遙距上堂,同時亦繼續歌唱事業,仲將留學同疫情期間嘅感受放入新歌《致未來的我》。新歌由歌詞到MV都係Feanna嘅經歷同感受,仲還原英國當地嘅房間布置,佢又重演隔離期間玩雪櫃同躺平食薯片飲汽水囓頽爆生活,而且同居密友仲首度曝光呀! 喺屋企係小公主嘅Feanna,出國後學識獨立生活,疫情期間仲令佢有更多時間思考同了解自己。佢話:「今次MV嘅故事係當一段感情結束,將自己收埋好好調整心情後,重拾自己,神氣咁行出門口離開呢個困境。導演將MV場景布置成我英國住嗰間房,專登搭咗個一樣嘅窗台,窗外都係會望到海和大樹。」 Feanna最初擔心到外國生活會寂寞,所以瞞住家人搵咗一個「伴」同居,放假回港怕分隔兩地,仲帶埋佢返嚟添,最初Feanna擔心媽媽會抗拒,點知同居密友閃電融入家中。佢話:「我先斬後奏領養咗一隻貓,我自細已經好想養貓,但媽咪有少少潔僻又話怕貓毛,唔准我養。我喺英國養咗一段時間冇講,但今次返香港唔知留幾耐,所以帶埋佢返嚟,因為我要隔離21日,貓貓就要交畀家人照顧,佢哋好快Friend咗啦!」