粵劇界17號傳出噩耗,資深粵劇大老倌 #尤聲普 今日傳出死訊,消息獲 #阮兆輝 證實。 普哥1934年喺廣州出世,其父 #尤驚鴻 亦係著名男旦。普哥9歲就已經以過人天賦加入戲行,初時一直以演文武生為主。 喺6、70年代,香港粵劇界百花齊放,先後師承多位行內大師嘅普哥,就先後為多個不同劇團效力,亦同波叔梁醒波、祥哥新馬師曾、鄧碧雲、麥炳榮同鳳凰女等大老倌多次合作唔同劇目,其時仲喺波叔建議下,改習丑生兼習老生。 70年代初,佢同 #阮兆輝、#李奇峰 等一眾年青演員組成 #香港實驗粵劇團,以實驗粵劇嘅新風格為宗旨,身兼導演同創作多職。 普哥一直參與多個唔同劇團嘅演出,後來亦為多個大型粵劇活動擔任策劃工作,對戲行有深厚貢獻。1992年更獲香港藝術家聯盟頒發舞台演員年獎。 而為咗表揚普哥對戲曲文化嘅推廣工作,政府2009年就向佢頒授榮譽勳章;2016年又獲香港演藝學院頒授榮譽院士、到2017年獲香港藝術發展獎頒發傑出藝術貢獻獎。 雖然普哥已經80多歲,不過近年依然繼續接受邀請演出,除咗向新一輩演員傳授戲曲技巧之外,同時亦都以身作則,繼續傳承戲曲藝術,可惜一代業界巨人今日與世長辭。