日前傳出胃癌留醫嘅 #廖啟智 星期日晚上撒手人寰,經理人公司向傳媒發稿證實噩耗(見下文),終年67歲。 日前佢太太 #陳敏兒 仍現身醫院探望,正當外界以為智叔情況平穩之際,就突然傳出令人沉痛嘅消息。 新聞重溫:https://business.facebook.com/TVBENews/videos/953762865371081/ 智叔1979年入讀無綫藝員訓練班,之後就一直演出大量舉足輕重嘅配角角色,唔少經典劇集好似《上海灘》、《飛越十八層、《薜仁貴征東》、《包青天》等都有佢嘅蹤影,佢同時又參與《歡樂今宵》、《城市追擊》嘅主持工作。 除咗電視演出之外,智叔亦向電影方向發展,更先後因為喺《籠民》同《證人》當中嘅精湛演出,而兩度獲香港電影金像獎最佳男配角寶座,智叔正邪皆可嘅演技,亦為佢贏得行內「黃金配角」美譽。 近年佢亦比較專注電影發展,除咗喺講述香港少棒發展嘅《點五步》當中扮演盧Sir之外,尚未上映嘅劇集改篇電影《尋秦記》智叔亦有份演出,而佢近年亦係浸會大學電影學院嘅講師同教學顧問。 智叔早喺藝訓班年代就認識後來嘅太太陳敏兒,佢哋1987年結婚之後育有3子,可惜幼子文諾2006年因為血癌離世,事件為佢哋一家帶嚟沉重打擊,不過信奉基督教嘅佢哋依然以正面態度面對人生逆境。 經理人公司聲明: 現在以萬般不捨的心情通知大家,我們敬愛的廖啟智先生(智叔) 於二零二一年三月二十八日晚上八時三十二分,於威爾斯親王醫院,安然在家人陪伴下離世,回歸天父懷中。 家人感謝醫護人員數月以來的悉心照顧,以及廣大市民及傳媒的關心和祝福。家人雖有不捨,但仍懷著盼望,將來於天家再聚。明白各界對智叔的關心,不過懇請大家給予智叔一家空間,處理智叔的身後事。有關喪禮安排,會稍後通知大家。 再次衷心感謝各界對智叔及其家人的關懷和愛護。 誠信娛樂發展有限公司敬啟 2021年3月28日 (影片截圖)