吳孟達病逝 笑聲永留存

吳孟達病逝 笑聲永留存 曾演出無數搞笑電影令華人世界歡笑不斷嘅「三叔」 #吳孟達 因病離世，享年70歲。田啟文向醫院門外記者證實死訊。 達哥7歲時隨父母由福建廈門移居香港。1973年投考無綫電視藝員訓練班，到79年憑電視劇《楚留香傳奇》當中嘅「胡鐵花」嶄露頭角。 直至80年代，達哥同 #周星馳 合演《蓋世豪俠》、《他來自江湖》等多部電視劇，因為兩人搞笑嘅演出擦出火花，令觀眾留下極為深刻印象，亦造就達哥同星爺兩人成為香港電影上最成功嘅喜劇拍檔之一。 達哥由90年代初開始活躍於電影圈，91年憑《天若有情》榮獲第10屆香港電影金像獎「最佳男配角」。之後達哥同合作無間嘅星爺合演《整蠱專家》、《賭聖》、《賭俠》、《逃學威龍》、《九品芝麻官》、《少林足球》等多部經典作品，亦多次創下票房紀錄。 2014年，達哥因為突然受病毒感染，導致心臟衰竭，需要緊急送入深切治療部留醫。留院其間，外間兩度誤傳達哥死訊，出院後佢就戒煙戒酒養生。 直至月前，達哥喺內地拍攝新戲宣傳海報，當時有傳媒影到達哥疑似胸口不適，站姿不穩，面上更露出痛苦表情。而敬業嘅達哥除咗堅持完成工作之外，仲因為延遲拍攝進度一事，向工作人員道歉，實在令人憂心。 而日前有報道指，達哥因為肝癌秘密入院留醫腫瘤科，需接受化療，可惜最後仍與世長辭，笑聲永留世間。