首位扮演鐵金剛007嘅演員辛康納利爵士離世,享年90歲。 生於蘇格蘭嘅辛康納利自小家貧,13歲已經要打工幫補家計,16歲加入英國皇家海軍服役,到1961年因為英俊外表同高大身形,成為「鐵金剛」電影嘅男主角。 電影上映後大受歡迎,佢亦先後7次演出,令「占士邦」同佢畫上等號。多年嚟佢演出嘅電影多不勝數,亦憑藉住精湛演技獲奧斯卡、英國電影學院同金球獎等多個獎項。 雖然佢政治上一直支持蘇格蘭獨立,不過喺2000年仍獲英女皇封爵。據外媒報道,佢身處巴哈馬群島,於睡夢中離世。 (網上圖片)