地址: NDSM-Plein 78 1033 WB Amsterdam Website: https://faralda.com/ 消費: 大約由€600至€1300,視乎房間種類和季節 呢間由起重機改建嘅酒店,全幢酒店只有三間房,每間房都有兩層,並有唔同主題,而且都係360度無遮擋睇晒阿姆斯特丹靚景,四周圍都唔會有其他高層建築,住客唔需要擔心有人會睇到自己嘅房間活動,私隱度相當高!而三間房亦有唔同主題,另外頂層仲有一個全阿姆斯特丹最高嘅無敵靚景戶外Jacuzzi,一邊浸一邊享受美景,真係勁歎! 住呢間酒店,雖然係一個超獨特體驗,但係都要留意返,佢上落係只有一部好細同好窄嘅電梯,位置方面,佢係位於距離阿姆斯特丹市中心稍遠嘅NDSM藝術區,交通有少少唔方便,但係由於有好多藝術家工場,所以周圍藝術味道極濃,隨處都係塗鴉,勁多打卡位!而酒店附近,除每月兩日舉行嘅二手跳蚤市場(IJ-Hallen)會熱鬧少少,其他大部份日子,都比較荒蕪清靜,酒店不設餐廳,但附近都有食肆酒吧,不過就要行少少路至到。