地址:Museumstraat 1, 1071 XX Amsterdam Website: https://www.rijksmuseum.nl/ 開放時間:09:00 – 17:00 入場費:Ticket Counter €20, Online €19 國立博物館,係阿姆斯特丹最大最有名嘅博物館,裡面嘅館藏,記載咗超過800年嘅荷蘭文化同藝術發展!而除咗節目裡面盈盈同麥明詩介紹Rembrant van Rijn(林布蘭)嘅Nightwatch(夜巡)同埋Johannes Vermeer(維米爾)嘅The Milkmaid(倒牛奶的女僕),博物館仲有好多荷蘭藝術家經典作品,絕對值得親眼欣賞。 至於博物館裡面嗰個靚到爆嘅「藝術圖書館」,平日係仍然開放畀市民借閱書籍,不過為免影響使用人士,低層嘅閱覽室係唔可以影相,想打卡留念,就要去圖書館最頂層位置。 溫馨提示一下:參觀人士,可以先download博物館嘅app,除咗有中文講解導覽,仲有好多遊館嘅Tip提供(例如參觀路線等等);仲有,如果計劃要仔細欣賞博物館裡面嘅展品,真係要留足一日架!