張致恒(Steven)噚日忽然公告同女友雯雯,已經升呢做父母,兩人已計劃結婚,Steven貼出一家三口嘅相大晒幸福。但點知Steven前女友梁皓恩(April)喺社交網站留言,自爆疑似一直被Steven蒙在鼓裏,之後佢去到Steven嘅社交網站留言踩場,力數Steven嘅不是,仲指男方欠佢錢。 三角關係已夠復雜,點知再有一位女子繼April留言,聲稱自己同埋幾位女仔都係被Steven欺騙,同係受害者。 事件發展至今Steven仍未開腔回應,不過英皇剛宣告原先Boy'z喺9月於紅館開騷,但因Steven事件,現個唱正式擱置:「各位傳媒朋友,經公司內部商討及與各方共識後,原定於9月舉行的 Boyz 演唱會將會擱置,公司現正積極商討及研究處理方案。一旦落實,將第一時間向各位交待。多謝各位。」 霍汶希稱:「今次演唱會取消主要原因是, Steven 應該有好多事要處理,應該不能已最好嘅狀態去準備今次嘅演唱會及彩排,所以我們寧願先取消,不想影響演唱會的質素呢。」據知Steven同關智斌日前喺泰國布吉拍攝演唱會宣傳片,噚日剛好完成,佢哋亦已分別離開布吉。而Boy'z紅館檔期原先係許志安開個唱,但因佢發生的士偷拍事件而取消,由Boy'z頂上,點知到依家Boy'z個唱都擱置。