地址:Schansend 7, 1509 AW Zaandam Website: https://www.dezaanseschans.nl 開放時間:09:00 - 17:00(視乎季節) 入場費:€5 被全世界旅遊節目、旅遊blogger、旅遊書介紹到爛晒、連荷蘭人都唔會去嘅風車村,特色除咗係風車,仲有好多好多旅客,要打卡影個人照,其實有啲難度。不過第一次嚟荷蘭,明知呢個地方旅遊點到爆,但難免又會好似馮盈盈咁,心思思都想嚟望一眼,打返張卡,畀人知嚟過荷蘭。 所以,都略略介紹返,要嚟風車村,先要注意其實佢唔係喺阿姆斯特丹,佢係位於Zaandam。留意返:風車村每座風車,其實裡面都係有獨立主題,要入去睇,每個都要畀€5。另外,風車村裡面亦有餐廳、精品店(主要都係賣典型荷蘭旅遊紀念品),仲可以租單車踩下,最後,都要提提大家,風車村裡面嘅洗手間,係要收費嘅(€0.50),所以諗住喺風車村逗留長時間,就要帶定散銀呀! 要去風車村嘅話,可以喺阿姆斯特丹中央車站,坐大約17分鐘鐵路,去到Koog Zaandijk站,然後步行15分鐘就到。另外,亦可以喺中央車站坐鐵路去Zaandam站,然後喺Zaandam Center嘅碼頭Monet Atelier,畀€13.50(小童€7.00)坐30分鐘船,暢遊運河兼去到風車村!