《 2022香港小姐競選 》一眾佳麗體驗生態保育

《 2022香港小姐競選 》嘅一眾佳麗日前嚟到海洋公園，齊齊體驗同了解生態保育知識，同好多可愛嘅動物互動，相信大家都可以學識點樣更好保育佢哋。除咗保護小動物，環境保護就更同我哋嘅生活息息相關，今次佳麗們入到香港富麗敦海洋公園酒店嘅全海景頂層泳池套房，帶大家感受吓點樣實現可持續發展嘅綠色生活。為咗令佳麗們了解更多香港嘅自然美景，梗係要出海欣賞吓鴨脷排獨特嘅風貌喇！完成一日咁特別又有意義嘅行程，一眾佳麗都分享個人環保心得角逐獎項，最後由4號許子萱獲得「香港富麗敦海洋公園生態保育大使」殊榮。