視周勵淇為女神 袁偉豪難忘十八年前地鐵邂逅

視周勵淇為女神 袁偉豪難忘十八年前地鐵邂逅 電視劇《再創世紀》入面，周勵淇（Niki）同袁偉豪飾演情侶，不過最後袁偉豪被殺，真係慘豬。雖然喺劇集入面唔能夠幸福結尾，但喺現實生活中，佢哋就去咗赤柱一邊食住雞蛋仔一邊漫步「拍拖」，仲各自分享自己嘅拍拖生活。 Niki話自己現實生活中拍拖都係食吓雞蛋仔、餵吓男朋友、行吓赤柱，「簡簡單單其實係幾開心㗎。」袁偉豪就話會揸吓電單車，「其實我嘅生活一啲都唔奢華，好貼地，鍾意去啲見到街坊嘅地方。」 拍《再創世紀》係Niki同袁偉豪第一次合作，不過原來佢哋嘅第一次相遇係袁偉豪入行前，曾經喺地鐵撞過當時仲係model嘅Niki，當時嘅情景袁偉豪仲記得好清楚𠻹！「大概喺十八年前，我哋嘅第一次相遇，就係喺地鐵車廂入面，我覺得我同你嘅相遇就好似《幾分鐘的約會》嘅歌詞裏面男女主角一樣，所以我今日錄番呢首歌送俾你，希望你鍾意啦。」除咗唱歌，佢哋仲翻拍咗陳百強《幾分鐘的約會》個MV，搞笑得嚟又浪漫。 提番起呢件事，Niki話：「拍戲時佢同我講番，我真係唔記得。」袁偉豪就笑住埋怨：「我同佢打晒招呼，佢點晒頭都唔記得咗嘅……你話晒都係當年嘅女神吖。」視Niki為女神嘅袁偉豪仲話，為咗今次嘅拍攝勁早起身，「你知唔知我今日為咗呢個job，我幾早起身呀？我約你兩點，我八點就起身啦！因為朝早喺度碌塊面囉，要碌番啲水腫。」氹到Niki哈哈大笑。 Youtube link： https://youtu.be/qiWFOhvkQ2c